კარდიოვერსია

თქვენი ექიმი აგიხსნით პროცედურის დეტალებს და უპასუხებს თქვენს კითხვებს პროცედურის შესახებ.

ჩვეულებრივ პროცედურის ხანგრძლივობა საშუალოდ 10-15 წუთია. რამოდენიმე მნიშვნელოვანი  საკითხი, რომელიც აუცილებლად უნდა იცოდეთ პროცედურის შესახებ:

1. პროცედურამდე თქვენ შეიძლება მოგთხოვონ სამკაულებისა და სხვა ნივთების მოხსნა;
2. ასევე მოგთხოვენ ტანსაცმლის გახდას და მოგცემენ სპეციალურ ხალათს;
3. პროცედურის წინ სასურველია შარდის ბუშტის დაცლა;
4. თუ თავზე გაქვთ გრძელი თმა, სასურველია მისი შეკვრა;
5. თუ საპროცედურო არეები (გულმკერდი) იქნება თმიანი, მოხდება მათი გაპარსვა და შესაბამისი ანტიბაქტერიული ხსნარებით დამუშავება;
6. თქვენ ჩაგიყენებენ პერიფერიული ვენის კათეტერს, რომლის საშუალებითაც პროცედურის დროს მოხდება წამლების შეყვანა;
7. პროცედურის დროს თქვენ იწვებით ზურგზე სამედიცინო საწოლში;
8. თქვენს სხეულზე დაამაგრებენ რამოდენიმე კაბელს, რათა თქვენი სასიცოცხლო პარამეტრები (გულისცემის სიხშირე, არტერიული წნევა, სისხლში ჟანგბადის შემცველობა) იყოს მუდმივი მონიტორული მეთვალყურეობის ქვეშ;
9. პროცედურაზე ინტრავენურად გაგიკეთდებათ გარკვეული მედიკამენტები, რომლებიც დაგეხმარებათ შფოთვის და შიშის მოხსნაში.
10. სედაციის ფონზე ჩაგიტარდებათ ტრანსეზოფაგური ექოკარდიოგრაფია (საყლაპავშიდა ექოკარდიოგრაფია) – ამ გამოკვლევის დროს დგინდება რამდენად უსაფრთხოა თქვენთვის კარდიოვერსიის ჩატარება; ადგენს რა გულის ღრუებში თრომბის არსებობა—არარსებობას, რითიც მინიმუმამდე დაჰყავს პროცედურის შემდეგ იშემიური ინსულტის განვითარების რისკი.
11. გულში თრომბის არსებობის შემთხვევაში პროცედურა გადაიდება დაახლოებით 1 თვით (ამ დროში სპეციალური წამლებით – სისხლის გამათხელებლებით მოხდება ამ თრომბის დაშლა).
12. თუ გამოირიცხება გულის ღრუებში თრომბის არსებობა, ანესთეზიოლოგი დაგაძინებთ, შემდეგ კი სხეულზე დაგიკავშირებენ ორ ელექტრულ პედს, რომელთა შორის გავლილი დენი გადატვირთავს თქვენი გულის მუშაობას, რაც უმეტეს შემთხვევაში არითმიის გაჩერებით მთავრდება.

გახსოვდეთ, ჩვეულებრივ ელექტრული კარდიოვერსია საკმაოდ უსაფრთხოა.

პროცედურა ტარდება სრულიად უმტკივნეულოდ, ზოგადი ანესთეზიის ფონზე. 

კლინიკაში

• პროცედურის შემდეგ ექიმი გადაამოწმებს თქვენ სასიცოცხლო პარამეტრებს;
• გულმკერდში ტკივილის, სისუსტის, გულისფრიალის, გულისცემის აჩქარების და სხვა ნებისმიერი პრობლემის შესახებ თქვენ დაუყოვნებლივ უნდა მოახდინოთ ექთნის ინფორმირება;
• რამოდენიმე წუთი აუცილებელია წოლითი რეჟიმი;
• გააქტიურება უნდა მოხდეს ეტაპობრივად. თავდაპირველად წამოჯექით საწოლში და შემდგომ რამოდენიმე წუთში ფრთხილად გადაადგილდით ექთნის თანდასწრებითა და საჭიროების შემთხვევაში დახმარებით;
• კვებას შეძლებთ პროცედურის დასრულებისთანავე რამოდენიმე წუთში;
• თქვენ გეყოლებათ თქვენი პალატის ექიმი, რომელიც მოგცემთ სპეციალურ ინსტრუქციას და დანიშნულებას;
• ბინაზე გაწერა მოხდება პროცედურის შემდეგ რამოდენიმე საათიანი დაკვირვების შემდეგ, როგორც წესი, იმავე დღეს.

სახლში

• თქვენ დაუბრუნდებით თქვენს ჩვეულ ცხოვრებას რამოდენიმე დღეში;
• კითხეთ ექიმს როდის შეიძლება სამსახურს დაუბრუნდეთ; პერიოდი ინდივიდუალურია და დამოკიდებულია თქვენი ინდივიდუალურ ჯანმრთელობის მდგომარეობაზე და სამსახურის სპეციფიკაზე.

დაუკავშირდით ექიმს, თუ გექნებათ:

• მკვეთრი გულის აჩქარება ან გულისფრიალი;
• დაბალი გულისცემის სიხშირე – “დაბალი პულსი”;
• ძლიერი ზოგადი სისუსტე;
• თავბრუსხვევა და გონების კარგვა;
• ტკივილი და ზეწოლა გულმკერდში;
• რომელიმე კიდურში ძალის დაქვეითება ან მეტყველების გაძნელება.

გახსოვდეთ, კარდიოვერსია არ გახლავთ არითმიის მექანიზმის მუდმივი მოცილება გულიდან. ძირითადად ის გახლავთ არითმიის დროებით გაჩერება. არითმიის რეციდივის შემთხვევაში, ზოგჯერ საჭირო ხდება განმეორებითი კარდიოვერსია ან კათეტერული აბლაცია. კარდიოვერსიის შემდეგ კვლავ დაგჭირდებათ არითმიის სამკურნალო წამლები. 

1. მსგავს შემთხვევაში შეიძლება მოხდეს არითმიის მუდმივ ფორმაში გადაყვანა და ისე მართვა.
2. განხილულ უნდა იქნას კათეტერული აბლაციის საკითხი – როგორც სარგებელი, ისე რისკები.